Baines vonast til að fá tækifæri gegn Egyptum

Vandræðastaðan í enska landsliðinu í dag er vinstri bakvarðarstaðan. Ashley Cole er meiddur og Wayne Bridge vill ekki spila við hlið kviðmágar síns John Terry.

Leighton Baines, bakvörður Everton, er talinn vera einn af þeim sem fái tækifæri til þess að sanna sig í bakverðinum en hann er í landsliðshópnum fyrir leikinn gegn Egyptum. Hann vonast til þess að fá að spila.

„Ég var að sjálfsögðu mjög glaður að vera valinn í landsliðið. Ég hef að sjálfsögðu verið að hugsa um þetta upp á síðkastið þar sem mitt nafn hefur verið í umræðunni. Það var því ánægjulegt að vera valinn," sagði Baines.

„Ég get ekki beðið eftir því að fá að upplifa að vera í enska landsliðinu og vonandi fæ ég tækifæri til þess að sanna mig. Það eru örugglega allir að hugsa um HM. Það er enn langt í mótið en ekkert óeðlilegt við að menn séu farnir að spá í það."