Gattuso ætlar að hætta í ítalska landsliðinu eftir HM

Gennaro Gattuso, miðjumaðurinn vinnusami í ítalska landsliðinu, gaf það út á blaðamannafundi í dag að hann ætlaði að leggja landsliðsskónna á hilluna eftir HM í Suður-Afríku. Ítalía mætir Paragvæ í Höfðaborg á mánudaginn í fyrsta leik sínum á HM.

Hinn 32 ára Gatttuso segir það vera sanngjarnast að gefa yngri og frískari leikmönnum tækifæri til að spila með ítalska liðinu enda hafi þeir meiri bensín á tanknum. Gattuso hefur leikið 72 landsleiki frá árinu 2000.

Gattuso átti erfitt tímabil með AC Milan þar sem hann var bæði mikið meiddur og mikið á bekknum. Það er almennt búist við því að hann verði varamaður á HM í Suður-Afríku en hann spilaði stórt hlutverk þegar Ítalir urðu heimsmeistarar fyrir fjórum árum.

Gattuso gæti þó byrjað í fyrsta leiknum á móti Paragvæ þar sem að Daniele De Rossi og Andrea Pirlo eru báðir meiddir og því vantar Marcelo Lippi mann inn á miðjuna hjá ítalska liðinu.

Gattuso talaði líka um það á blaðamannafundinum að hann dreymdi um það að fá tækifæri til að þjálfa ítalska liðið á HM í framtíðinni.