Lögfræðingur segir borgina slá ryki í augu almennings

 „Þetta er ámælisvert og greinilega tilraun til þess að slá ryki í augu almennings,“ segir Tómas Jónsson, lögmaður Brimborgar, sem gagnrýnir borgaryfirvöld fyrir að afvegaleiða umræðuna um úrskurð samgöngu- og sveitarstjórnarráðuneytisins í kærumáli fyrirtækisins vegna synjunar á lóðarskilum á Esjumelum.

Eftir úrskurð samöngu- og sveitarstjórnaráðuneytisins í máli Brimborgar hefur borgin vitnað til niðurstöðu Héraðsdóms Reykjavíkur frá í desember í máli Hugar ehf. sem borgin synjaði um að fá að skila tæplega 300 milljóna króna lóð í Hádegismóum. Héraðsdómur sagði að borginni hefði ekki borið að taka við lóðinni aftur. Borgin hefur sagt þennan dóm og úrskurð ráðuneytisins stangast algjörlega á.

Tómas Jónsson segir málin hins vegar ekki sambærileg. Það sé rétt að Brimborg hafi byggt á því að til staðar væri einhliða skilaréttur á lóðum. Þessu hafi bæði héraðsdómur og ráðuneytið hafnað; héraðsdómur í máli Hugar og ráðuneytið í máli Brimborgar. Málin væru hins vegar frábrugðin í veigamiklum atriðum enda hafi Brimborg að auki byggt málflutning sinn á því að Reykjavíkurborg hefði brotið stjórnsýslureglur gagnvart félaginu, þar með talda jafnræðisregluna.

„Ráðuneytið fellst á þau rök og á því byggist niðurstaða ráðuneytisins um að ákvörðun Reykjavíkurborgar sé ógild. Þessi slæma stjórnsýsla var ekki til umfjöllunar í nefndum héraðsdómi enda átti Brimborg enga aðild að því máli,“ segir Tómas. „Niðurstaða héraðsdóms og ráðuneytisins var samhljóða varðandi skilaréttinn en stjórnsýsluafglöp borgarinnar og meint valdníðsla gagnvart Brimborg var alls ekki til umfjöllunar í þessum héraðsdómi sem borgin ber fyrir sig.“

Kristbjörg Stephensen borgarlögmaður segir þetta ekki rétt hjá Tómasi. „Ein meginforsenda ráðuneytisins fyrir sinni niðurstöðu er að í framkvæmd hafi lóðarhöfum atvinnulóða verið heimil einhliða skil lóða. Af þeim sökum hafi sú ákvörðun Reykjavíkurborgar, að hætta að taka við lóðum, talist meðal annars brot á jafnræðisreglunni. Héraðsdómur kemst að þveröfugri niðurstöðu. Enginn einhliða skilaréttur hafi verið til staðar og því hafi engin jafnræðisregla verið brotin,“ útskýrir borgarlögmaður.

gar@frettabladid.is