Umfjöllun: Portúgalar búnir með skylduna í Laugardalnum

Portúgalir kláruðu skyldusigurinn á Íslandi með öruggum 3-1 sigri á Laugardalsvellinum í kvöld. Íslenska landsliðið situr því áfram eitt á botni H- riðilsins með ekkert stig eftir fyrstu þrjá leiki sína.

Íslenska liðið sýndi styrk með því að vinna sig inn í leikinn eftir að hafa fengið á sig mark í upphafi leiks en þegar upp var staðið þá var sigur Portúgala sannfærandi og þeir þurftu enga stjörnuframmistöðu í laugardalnum til þess að tryggja sér öruggan sigur.

Það hefði vissulega getað farið verr þegar tililt er tekið til þess að Portúgalir fengu algjöra draumabyrjun og voru komnir í 1-0 eftir innan við þrjár mínútur. Flestir bjuggust þá við einhverri stórskotahríð frá Cristiano Ronaldo og félögum í kjölfarið en stærsta hluta leiksins gekk íslensku strákunum vel að verjast upphlaupum Portúgala.

Cristiano Ronaldo var kannski bara orðinn saddur eftir markið sitt í upphafi leiks og fyrrum félagi hans hjá Manchester United, Nani, gerði fátt að viti í leiknum og var ótrúlega mistækur í öllu því sem að hann reyndi. Það var kannski eins gott en það verður ekki tekið af íslensku varnarmönnunum að þeir mættu þessum köppum af einbeitingu og skynsemi.

Portúgalir fengu sannkallaða draumabyrjun í leiknum. Eftir þrjár mínútur gaf Theodór Elmar Bjarnason ódýra aukaspyrnu á 30 metra færi og allir á vellinum vissu hvað beið. Cristiano Ronaldo steig fram og skoraði á klassískan Ronaldo-hátt með hnitmiðuðu þruumskoti, rétt fyrir vegginn og í bláhornið. Leikurinn var varla byrjaður og Ísland var komið undir.

Íslenska liðið tókst hinsvegar að rífa sig upp eftir þetta áfall og vinna sig inn í leikinn á ný. Liðið fékk hornspyrnu eftir fyrstu alvöru sókn sína og þar sýndi Heiðar Helguson enn á ný hversu öflugur hann er í loftinu.

Heiðar Helguson jafnaði leikinn á 17. mínútu með skalla eftir hornspyrnu frá Indriða Sigurðssyni. Portúgalir reyndu að bjarga á marklínu en annar aðstoðardómarinn taldi að boltinn hafi farið yfir línuna.

Strax eftir jöfnunarmarkið fékk Hugo Almeida besta færi Portúgal í hálfleiknum en skot hans vinstra megin úr teignum fór rétt framhjá.

Portúgalir voru farnir að pirra sig yfir stöðunni og það var lítið að gerast í leik liðsins þegar boltinn barst til Raul Meireles fyrir utan teig á 27. mínútu. Liverpool-maðurinn lét vaða og smellhitti boltann upp í bláhornið. Við þetta fór pressan af portúgalska liðinu og þeir gátu slakað á.

Fyrri hálfleikurinn var góður hjá íslenska liðinu þrátt fyrir þessi tvö mörk sem voru að glæsilegri gerðinni og bæði illstöðvanleg. Fyrstu 45 mínúturnar tóku hinsvegar mikið á og seinni hálfleikurinn varð íslensku strákunum því erfiður. Portúgalir héldu sáttir sínu og íslenska liðið skapaði nánast ekkert fram á völlinn.

Íslenska liðið lifði í voninni um jöfnunarmark og liðið fór að færa sig aðeins framar um miðjan hálfleikinn. Ólafur Jóhannesson bætti í sóknina en aðeins nokkrum mínútum síðar klárarði portígalska liðið leikinn með þriðja markinu.

Gunnleifur Gunnleifsson, gerði slæm mistök í markinu. Skömmu áður hafði hann varið frábærlega frá Helder Postiga en í þriðja marki Portúgala missti hann frá sér fyrirgjöf frá Cristiano Ronaldo á klaufalegan hátt. Umræddur Helder Postiga var á réttum stað á marklínunni og ýtti boltanum yfir marklínuna.

Eftir þriðja markið var enginn orka eftir í íslenska liðinu til að vinna sig aftur inn í leikinn og Portúgalir lönduðu öruggum sigri. Cristiano Ronaldo átti tvo ágæta spretti í lokin en tókst ekki að skora fjórða markið en Portúgalir gengu sáttir með þrjú stig

Ísland 1-3 Portúgal

Laugardalsvöllur

Dómari: Thomas Einwaller frá Austurríki (6)

Áhorfendur: 9766

Mörkin:

0-1 Cristiano Ronaldo (3.)

1-1 Heiðar Helguason (17.)

1-2 Raul Meireles (27.)

1-3 Helder Postiga (72.)

Tölfræðin:

Skot (á mark): 3-15 (2-8)

Varin skot: Gunnleifur 4 - Eduardo 1

Horn: 6-5

Aukaspyrnur fengnar: 15-20

Rangstæður: 3-4

Smelltu hér til að opna Boltavaktina og lesa lýsingu leiksins: Ísland - Portúgal.