Theodór Elmar: Hljóp mig alveg tóman

„Við vorum að mæta alveg gríðarlega sterku liði og mér fannst menn leggja sig mikið fram hér í kvöld,“ sagði Theodór Elmar Bjarnason,  leikmaður íslenska landsliðsins, eftir tapið gegn Portúgal í kvöld.

„Við gáfumst aldrei upp í leiknum og héldum alltaf áfram okkar vinnu. Það er mjög gaman að mæta svona liði og menn hlupu alveg eins og vitleysingar allan leikinn, þeir voru einfaldlega bara betri en við,“ sagði Theodór.

„Við náðum að skapa okkur nokkur hálffæri í leiknum sem komu eftir föst leikatriði og með smá heppni hefðum við getað skorað fleiri mörk.“

Theodór Elmar var að leika sinn fyrsta landsleik í langan tíma og virkaði oft á tíðum virkilega sprækur.

„Það var frábært að fá að spila en ég hefði átt að vera betri fram á við þar sem ég er bestur. Ég reyndi bara að hlaupa mig tóman og berjast eins og ég gat fyrir liðið. Útfrá því er ég nokkuð sáttur við mína frammistöðu í leiknum,“ sagði Theodór.

Íslenska landsliðið hefur ekki riðið feitum hesti í þessari undankeppni og hafa tapað öllum leikjunum þremur.

,,Þetta er alls ekki ásættanlegt hjá okkur. Ég sá strákana spila á móti Norðmönnum og Dönum og það er með hreinum ólíkindum að ekkert stig hafi fengist úr þeim leikjum. En ef við skoðum þennan leik þá er margt sem bendir til þess að við séum í framför,“ sagði Theodór Elmar Bjarnason eftir leikinn í kvöld.