Draumabyrjun Englendinga breyttist í markvarðarmartröð

England og Bandaríkin gerðu 1-1 jafntefli í fyrsta leik sínum í C-riðli á HM í Suður-Afríku í kvöld. Hræðileg mistök markvarðarins Robert Green í lok fyrri hálfleiks kostuðu Englendinga sigurinn.

Englendingar fengu algjöra draumabyrjun í leiknum og á HM þegar Steven Gerrard kom þeim yfir eftir aðeins 4 mínútur. Hann fékk þá laglega sendingu frá Emile Heskey og skoraði framhjá Tim Howard í marki bandaríska liðsins.

Draumurinn breyttist hinsvegar í martröð fimm mínútum fyrir hálfleik þegar Robert Green missti laust og hættulítið skot Clint Dempsey undir sig og í markið. Hræðileg mistök og þau kostuðu liðið sigurinn.

Enska liðið fékk nokkrar ágætar sóknir í seinni hálfleik sem hefði getað skilað þeim sigurmarki en það kom ekki og liðin sættust á jafntefli.

Þetta var svo sannarlega ekki kvöld Fabio Capello, þjálfara enska landsliðsins, sem tók þrenns konar áhættur í þessum leik og það má segja að þær allar hafi sprungið framan í hann.

Capello setti Robert Green í markið en Green gerði hræðileg mistök. Capello ákvað að nota James Milner þrátt fyrir veikindi og Milner entist bara í 30 mínútur. Þá ákvað hann að taka áhættuna á því að nota Ledley King en þurfti síðan að taka hann útaf í hálfleik og setja Jamie Carragher inn.