Hicks eyðilagður og reiður: Sögulegt svindl

Tom Hicks, annar fyrrum eiganda Liverpool, er brjálaður eftir að félagið var selt í hans óþökk í gær.

Hicks og félagi hans, George Gillett, keyptu félagið árið 2007. Hallað hefur undan fæti þá og höfðu þeir ekki efni á að greiða til baka risavaxna skuld skoska RBS-bankann sem var með gjalddaga í gær.

Það gerði það að verkum að Hicks og Gillett urðu að afsala sér meirihlutarétti í stjörninni sem varð að lokum til þess að hægt var að selja félagið öðrum í þeirra óþökk.

Nýi eigandinn er NESV, bandarískt eignarhaldsfélag sem einnig á bandaríska hafnarboltaliðið Boston Red Sox.

„Það eru til betri eigendur fyrir Liverpool en eigendur Boston Red Sox," sagði Hicks í samtali við Sky Sports.

„Ég er í sjokki, ég er eyðilagður og pirraður. Þetta eru mikil vonbrigði fyrir mig. Það sem átti sér stað var þaulskipulagt samsæri gegn okkur sem tók marga mánuði í framkvæmd."

„Þetta hefur skaðað fjölskyldu mína mikið. Þetta var dýrmæt eign og hún var tekin af mér í sögulegu svindli."

Hann sendi Martin Broughton, sem var ráðinn sem stjórnarformaður nú í vetur, tóninn.

„Martin Broughton vildi láta sig líta vel út og að hann yrði maðurinn sem myndi losa Liverpool við þessa Bandaríkjamenn. Svo seldi hann öðrum Bandaríkjamönnum félagið."

Hicks sagði enn fremur að hann hafi sjálfur fundið eigendur sem hefðu hentað Liverpool betur.

„Sjáðu hvað gerðist hjá Manchester City. Það voru þannig eigendur sem við vorum að reyna að finna fyrir Liverpool."

Hann viðurkenndi að skuldastaða félagsins hefði verið slæm. Engu að síður hefði hann haft úrræði til að borga RBS-bankanum skuldina risavöxnu en fékk ekki að gera það.

Hicks og Gillett hafa dregið til baka skaðabótarkröfu sína fyrir bandarískum dómstólum þar sem þeir kröfðust 1,6 milljarða Bandaríkjadala í skaðabætur. Þeir útiloka hins vegar ekki að sækja skaðabótamál í Englandi.

„Þessu er ekki lokið," sagði Hicks.