Gulbrandsen hættir fyrir þrítugt

Norska knattspyrnukonan Solveig Gulbrandsen hefur ákveðið að hætta að spila knattspyrnu þó svo að hún sé ekki nema 29 ára gömul.

Gulbrandsen hefur verið ein besta knattspyrnukona Noregs undanfarin ár og spilað á átta stórmótum með norska landsliðinu. Hún varð Ólympíumeistari með Noregi árið 2000.

Hún á að baki 154 landsleiki og skoraði í þeim 47 mörk. Framundan á næsta ári er HM í Þýskalandi og átti Gulbrandsen sinn þátt í því að tryggja liðinu farseðilinn til Þýskalands.

Um helgina varð hún norskur meistari með Stabæk sem vann sinn fyrsta meistartitil í sögunni eftir 3-0 sigur á Trondheims-Örn.

„Ég hef ekki löngun til að taka eitt tímabil í viðbót," sagði hún. „Ég veit að HM er á næsta ári en ég hef áður spila á HM og mér finnst að ég sé búin að taka út minn skammt."

„Það getur verið að löngunin komi aftur síðar en núna vil ég eyða meiri tíma með fjölskyldu míni - eiginmanninum og fjögurra ára syni."

Hún er þó ekki hætt afskiptum af fótbolta. „Ég sé fyrir mér að ég snú mér að þjálfun í framtíðinni. Ég ætla ekki að kveðja knattspyrnuna að eilífu nú."