Enginn hefur tapað fyrsta leik og orðið heimsmeistari

Evrópumeistarar Spánverja þurfa að endurskrifa söguna ætli þeir sér að vinna heimsmeistaratitilinn í Suður-Afríku. Þetta var ljóst eftir að spænska liðið tapaði 0-1 í fyrsta leiknum sínum sem var á móti Svisslendingum í dag.

Þrjú lið hafa komist næst því að ná að koma til baka og vinna heimsmeistaratitilinn eftir tap í fyrsta leik. Vestur-Þýskaland (1982), Argentína (1990) og Ítalía (1994) töpuðu sínum fyrsta leik í þessum keppnum en fóru alla leið í úrslitaleikinn.

Vestur-Þjóðverjar (þá ríkjandi Evrópumeistarar) töpuðu 1-2 á móti Alsír í fyrsta leik sínum á HM 1982 en unnu síðan tvo síðustu leiki sína í riðlinum og fóru á endanum alla leið í úrslitaleikinn þar sem töpuðu 1-3 á móti Ítalíu.

Argentínumenn (þá ríkjandi Heimsmeistarar) töpuðu 0-1 á móti Kamerún í opnunarleiknum á HM 1990 en skriðu inn í 16 liða úrslitin og fóru á endanum alla leið í úrslitaleikinn þar sem töpuðu 0-1 á móti Vestur-Þýskalandi.

Ítalir töpuðu 0-1 á móti Írlandi í fyrsta leik sínum á HM 1994 en skriðu inn í 16 liða úrslitin og fóru á endanum alla leið í úrslitaleikinn þar sem töpuðu í vítakeppni á móti Brasilíu.

Næsti leikur Spánverja er á móti Hondúras á mánudaginn kemur. Lokaleikur liðsins í riðlakeppninni er síðan á móti Chile fjórum dögum síðar.