Saka Hjálmar um langvarandi tregðu við upplýsingagjöf

Fjórmenningarnir í stjórn Blaðamannafélags Íslands sem neituðu að skrifa undir reikninga félagsins á stjórnarfundi í gær hafa sent frá sér yfirlýsingu sem birt er á vef BÍ. Þar segir meðal annars að ástæða þess að þau hafi ekki viljað undirrita reikningana hafi verið langvarandi tregða Hjálmars Jónssonar framkvæmdastjóra til að veita stjórninni upplýsingar um rekstur félagsins.

Fjórmenningarnir, en þar á meðal eru formaður og varaformaður félagsins, vísa til bókunar á stjórnarfundi í febrúar síðastliðnum þar sem meðal annars farið var þess á leit við Hjálmar að hann kæmi með upplýsingar um laun og hlunnindi þeirra sem hafa verið í starfi fyrir félagið og sjóði þess undanfarin tvö ár.

Þá var á sama fundi óskað eftir því að framkvæmdastjóri skilaði stjórninni ítarlegri greinargerð um öll störf sín fyrir félagið, til dæmis um vinnuframlag, einstaka verkþætti og vægi þeirra í hans starfi.

Rýr svör framkvæmdastjóra

„Skemmst er frá því að segja að svör framkvæmdastjórans hafa verið rýr og engin þeirra gagna sem óskað var eftir hafa skilað sér. Að auki hafa stjórnarmenn oftsinnis óskað annarra upplýsinga um rekstur og fjármál félagsins en ekki fengið."

Þá er þess getið að stjórnin hafi séð ársreikning félagsins fyrst á fundinum í gær. „Þar með talið formaður, varaformaður og gjaldkeri. Árseikningurinn var lagður fram í þremur útprentuðunum eintökum og framkvæmdastjórinn neitaði að fjölrita eintök handa stjórnarmönnum á fundinum."

„Við hörmum þá stöðu sem uppi er í félaginu en áréttum þá afstöðu sem við höfum ítrekað lýst á stjórnarfundum, að fara eigi að félagslögum og að allt sem varðar reksturinn skuli vera uppi á borðum og stjórninni aðgengilegt. Framkvæmdastjórinn einn hefur alla þræði er varða daglegan rekstur og fjármál félagsins í hendi sér, en skal lúta eftirliti stjórnar," segja stjórnarmennirnir ennfremur og bæta við að lokum: „Við teljum framgöngu hans undanfarna mánuði hafa gert okkur ókleift að rækja eftirlitsskyldur okkar og því gripum við til þess óyndisúrræðis að undirrita ekki reikninga félagsins í gær."

Hér má einnig sjá fundargerð stjórnar frá því í febrúar.