Adriano fallinn á ný - kærustuvandamál kveikjan

Brasilíumanninum Adriano ætlar ekki að takast að losna frá Bakkusi. Framkvæmdastjóri brasilíska liðsins Flamengo sagði í viðtali við brasilíska útvarpsstöð að Adriano væri í leyfi frá liðinu þar sem að hann væri farinn að drekka á ný eftir að hafa orðið fyrir persónulegu áfalli.

„Þegar hann byrjar að drekka þá getur hann ekki hætt," sagði Marcos Braz, framkvæmdastjóri Flamengo liðsins. „Hann var búinn að vinna bug á þessu vandamáli en féll á ný eftir að hafa þurft að ganga í gegnum erfiða persónulega hluti," sagði Braz.

Brasilískir fjölmiðlar hafa greint frá ósætti milli Adriano og kærustu hans í partýi en Adriano var hvergi sjáanlegur á æfingu liðsins daginn eftir.

Adriano hefur spilað vel með Flamengo og var í landsliðshópi Brasilíu í vináttulandsleik á móti Írlandi í síðustu viku. Hann hefur skorað 25 mörk í 36 leikjum með Flamengo síðan að hann kom til liðsins fyrir tæpu ári.