Lars Lagerback: Nígería getur komist í undanúrslitin

Svíinn Lars Lagerback, sem fyrir skömmu tók við landsliði Nígeríu, er bjartsýnn fyrir komandi heimsmeistarakeppni í Suður-Afríku eftir 5-2 sigur á Kóngó í vináttulandsleik í gær.

„Ég tel að það sé möguleiki fyrir Nígeríu að komast alla leið í undanúrslitin í Suður-Afríku. Allir þjálfarar og allar þjóðir eiga að sjálfsögðu að stefna á það að reyna að vinna heimsmeistarakeppnina," sagði Lars Lagerback.

„Það eru margir hæfileikaríkir leikmenn í nígeríska landsliðinu og við þurfum bara að vinna í því að fá alla til að vinna betur saman. Takist það þá getum við náð langt á HM," sagði Lagerback en hann hefur tvisvar farið með sænska landsliðið á HM; 2002 í Japan og Suður-Kóreu og 2006 í Þýskalandi.

„Ég reyni núna að skipuleggja mig vel fyrir fram þannig að það sé allt klárt þegar liðið hittist í æfingabúðunum fyrir HM," sagði Lagerback sem var þjálfari sænska landsliðsins frá 2000 til 2009.