Messi spilar fótbolta eins og Jesús

Diego Maradona, landsliðsþjálfari Argentínu, er á meðal þeirra manna sem sem urðu nánast orðlausir er þeir horfðu á Lionel Messi leika sér að Arsenal síðasta þriðjudag.

Maradona var reyndar ekki orðlaus heldur lét gullkorn falla eins og svo oft áður.

„Við erum öll glöð fyrir hans hönd og við vitum líka hve heppin við erum að hann sé Argentínumaður. Hann er að spila fótbolta eins og sjálfur Jesús þessa dagana," sagði Maradona en litlum sögum fer reyndar af knattspyrnuafrekum frelsarans í Biblíunni.

Margir hafa verið að bera Messi og Maradona saman þessa dagana enda óumdeilanlega tveir af bestu leikmönnum allra tíma.

„Ég sagði honum um dagnn að gera allt sem hann getur við feril sinn. Þegar honum lýkur sjáum við hvor okkar var betri," sagði Maradona.