Haraldur: Við unnum mest með varnarleik liðsins í vetur

Haraldur Guðmundsson, fyrirliði Keflavíkur, átti mjög góðan leik í miðri Keflavíkurvörninni og stjórnaði varnarleik liðsins af festu í 2-1 sigri á Fylki á Njarðtaksvellinum í Njarðvík í kvöld.

„Þetta er eins og það getur verið best," sagði Haraldur aðspurður um það að vera með fullt hús stiga á toppnum eftir fyrstu þrjá leikina.

„Þetta voru slagsmál út í gegn og var bara baráttuleikur. Við vissum það að við værum að fara út í svona leik því við þekkjum stílinn hjá Óla. Við vissum það líka að ef að við myndum mæta þeim í baráttunni þá myndum við lenda ofan á," sagði Haraldur.

Fylkir byrjaði leikinn mjög vel en Keflvíkingar skoruðu hinsvegar fyrsta markið gegn gangi leiksins.

„Þeir pressuðu okkur vel í upphafi leiksins og við vorum í vandræðum í byrjun. Við náðum hinsvegar að vinna okkur smátt og smátt inn í leikinn. Við fáum náttúrulega þetta víti sem gefur okkur helling. Við fengum mark í leikinn sem hjálpaði mikið. Þeir ná að svara snemma í seinni hálfleik en það var frábært hjá okkur að ná þá að klára þetta," sagði Haraldur.

Tvær gullsendingar Guðmundar Steinarssonar sköpuðu mörk Keflavíkur í leiknum. „Guðmundur er frábær leikmaður og reyndist okkur vel í dag," sagði Haraldur um framherjann stórhættulega.

„Við unnum mest með varnarleik liðsins í vetur alveg frá fremsta til aftasta manns. Það er allt liðið sem vinnur gríðarlega mikla vinnu í vörninni. Það eru ekki bara við fjórir í öftustu línunni og markvörðurinn sem eru að spila vörnina vel heldur er miklu betri varnarskipulag á liðinu heldur en verið hefur verið," sagði Haraldur.

„Það er gríðarlegur styrkur hjá okkur að klára svona leik. Við erum í fyrsta skipti á heimavelli ef heimavöll skyldi kalla. Ég segi kannski ekki að þetta hafi verið þriðji útileikurinn í röð því það kemur kannski fleira fólk á leiki hér en á útileikina," sagði Haraldur.

„Það eru bara þrír leikir búnir af 22 og við erum alveg sallarólegir yfir þessu. Þessi níu stig verða samt aldrei tekin af okkur, við erum einir efstir eins og staðan er í dag og við erum ánægðir með það," sagði Haraldur að lokum.