Dómari frá Úsbekistan dæmir fyrsta leikinn á HM

Úsbekastinn Ravshan Irmatov, besti dómari Asíu 2008 og 2009, fær þann heiður að dæma opnunarleikinn á HM sem fer fram á föstudaginn kemur og er á milli heimamanna í Suður-Afríku og Mexíkó.

Það hefur alltaf verið krefjandi verkefni fyrir dómara að dæma fyrsta leik keppninnar og leggja þar sem línurnar fyrir keppnina á meðan allur heimurinnn fylgist með.

Irmatov er 32 ára gamall og hefur verið alþjóðlegur dómari síðan 2003. Hann stærsta FIFA-verkefni til þessa var að dæma úrslitaleikinn í heimsmeistarakeppni félagsliða árið 2008.

Það er líka búið að raða dómurum niður á aðra leiki fyrstu daga heimsmeistarakeppninnar. Meðal þeirra má nefna að Brasilíumaðurinn Carlos Simon dæmir leik Englands og Bandaríkjanna en Japaninn Yuichi Nishimura dæmir leik Frakklands og Úrúgvæ.