Fabio Capello: Allt gott nema úrslitin

Fabio Capello, landsliðsþjálfari Englendinga, var sáttur með frammistöðu sinna manna í 1-1 jafnteflinu á móti Bandaríkjunum í kvöld í fyrsta leik enska landsliðsins á HM í Suður-Afríku.

„Við bjuggum til fjölda færa til þess að skora. Við pressuðum mikið og spiluðum góðan leik. Þeir náðu einu skoti og skoruðu. Við erum í góðum gír sem lið og við munum spila enn betur í næsta leik. Úrslitin eru það eina sem ekki var gott," sagði Fabio Capello við BBC eftir leikinn.

„Stundum klúðra menn dauðafæri í sókninni og stundum gera markmenn mistök. Robert Green spilaði mjög vel í seinni hálfleiknum en mistök eru samt mistök," sagði Capello um mistök Robert Green sem gaf Bandaríkjamönnum jöfnunarmarkið.

„Það var allt jákvætt í þessum leik nema úrslitin. Steven og Frank spiluðu vel og allir leikmenn liðsins spiluðu vel. Við fengum færi og við náum vonandi að nýta þau betur næst," sagði Fabio Capello.