Umfjöllun: Ástandið í Vesturbænum versnar enn

Liðið sem lék við hvurn sinn fingur á undirbúningstímabilinu og margir sáu ekki hvernig ætti að stöðva í sumar er enn ekki búið að vinna leik eftir fimm umferðir í Pepsi-deildinni.

KR tapaði 1-2 fyrir erkifjendum sínum í Val í kvöld en Arnar Sveinn Geirsson skoraði sigurmarkið í leiknum í seinni hálfleik.

KR-ingar byrjuðu leikinn betur en lentu hinsvegar undir þegar Baldur Aðalsteinsson skoraði beint úr aukaspyrnu. Heimamenn lögðu ekki árar í bát og Óskar Örn Hauksson jafnaði metin eftir að Björgólfur Takefusa rúllaði knettinum til hans.

KR var líklegra til að skora á lokakafla hálfleiksins en staðan 1-1 í leikhléi. Valsmenn komu síðan gríðarlega öflugir til seinni hálfleiksins og heimamenn urðu undir í baráttunni.

Sigurbjörn Hreiðarsson átti hörkuflottan leik á miðjunni hjá Val og hann lagði upp sigurmarkið fyrir Arnar Svein Geirsson. Arnar komst einn gegn markverði og kláraði færið vel. Þessi efnilegi leikmaður hefur farið á kostum í upphafi móts með styrk sínum og hraða.

Við þetta mark vöknuðu KR-ingar en Valsmenn færðu sig meira til baka og KR átti fá svör. Liðið virkaði mjög hugmyndalaust og leikmenn oft á tíðum ansi áhugalausir.

Ástandið í Vesturbænum er langt frá því gott og Logi Ólafsson hefur ekki fundið leiðina út úr þessum vandræðum. Stóll hans er ekki sá traustasti um þessar mundir og margir stuðningsmenn á vellinum í kvöld kölluðu eftir breytingum. Yfirritaður bað Pétur Pétursson, aðstoðarþjálfara Loga, um viðtal eftir leik en Pétur strunsaði beint inn í klefa.

Það verður þó að hrósa Valsmönnum en sá sem þetta ritar er mjög hrifinn af því hvernig liðið hefur verið að mótast í síðustu leikjum og þéttast sem lið. Ef fram heldur sem horfir geta Valsmenn vel barist um Íslandsmeistaratitilinn þetta sumarið, það er þó ekki líklegt að þeir fái að kljást við KR í þeirri baráttu.

KR - Valur 1-2

0-1 Baldur Aðalsteinsson (11.)

1-1 Óskar Örn Hauksson (25.)

1-2 Arnar Sveinn Geirsson (56.)

Skot (á mark): 12-10 (4-5)

Varin skot: Moldsked 3 - Kjartan 3

Horn: 2-3

Aukaspyrnur fengnar: 15-16

Rangstöður: 1-1

Áhorfendur: 2.252

Dómari: Magnús Þórisson 4

KR 4-4-2

Lars Ivar Moldsked 5

Skúli Jón Friðgeirsson 5

Mark Rutgers 4

Grétar Sigfinnur Sigurðarson 6

Guðmundur Reynir Gunnarsson 5

Gunnar Örn Jónsson 3

(62. Jordao Diogo 6)

Baldur Sigurðsson 5

Bjarni Guðjónsson 6

Óskar Örn Hauksson 7

Björgólfur Takefusa 4

Kjartan Henry Finnbogason 4

(73. Gunnar Kristjánsson -)

Valur 4-3-3

Kjartan Sturluson 6

Greg Ross 6

Reynir Leósson 6

Atli Sveinn Þórarinsson 7

Martin Pedersen 7

Haukur Páll Sigurðsson 5

(52. Rúnar Már Sigurjónsson 6)

Sigurbjörn Hreiðarsson 8* - Maður leiksins

Ian Jeffs 7

Baldur Ingimar Aðalsteinsson 7

(73. Þórir Guðjónsson -)

Arnar Sveinn Geirsson 7

(87. Stefán Eggertsson -)

Danni König 7