Enginn Guus Hiddink eða Sven Goran Eriksson

Franski þjálfarinn Philippe Troussier mun væntanlega taka við landsliði Fílabeinsstrandarinnar eftir að forráðamönnum knattspyrnusambands landsins tókst ekki að semja við háklassa þjálfara á borð við Guus Hiddink eða Sven Goran Eriksson.

Hinn 54 ára gamli Philippe Troussier hefur áður þjálfað landslið Japans, Nígeríu, Katar og Marokkó en hann er án starfs þessa stundina. Hann hefur oft verið kallaður "Hvíti galdralæknirinn" vegna velgengi sinnar með afrísk lið.

Bosníumaðurinn Vahid Halilhodzic var rekinn frá liðinu í síðasta mánuði eftir slakt gengi í Afríkukeppninni þar sem Fílabeinsströndin datt út í átta liða úrslitum. Framundan er HM í Suður-Afríku og þar er búist við miklu af Didier Drogba og félögum.