Leikmenn Englands þurfa að passa sig á grasinu á Wembley í kvöld

Enn og aftur hafa leikmenn áhyggjur af grasinu á hinum fokdýra Wembley leikvangi í London. Það virðist sem allt við leikvanginn sé fullkomið, nema kannski það mikilvægasta, leikvöllurinn sjálfur. Sá nýjasti til að kvarta er fyrirliði enska landsliðsins, Rio Ferdinand. Rio leiðir lið sitt út á völlinn í kvöld þegar Mexíkó verður í heimsókn í vináttulandsleik. Báðar þjóðir undirbúa sig fyrir HM í kvöld. Búist er við miklum breytingum á byrjunarliði Englendinga frá sínu sterkasta liði og þeir sem spiluðu úrslitaleik bikarkeppninnar ættu að fá frí. Reyndar segist Fabio Capello þegar vera búinn að ákveða hvaða 23 leikmenn fari til Suður Afríku en hann hefur úr 30 mönnum að velja í kvöld. Gary Taylor-Fletcher, leikmaður Blackpool, meddist einmitt í leiknum við Cardiff um helgina á Wembley þegar hann tognaði á ökkla. Hann varaði leikmenn landsliðsins við vellinum eftir leikinn. “Þeir þurfa að passa sig þarna. HM er á næsta leiti og ef þeir meiðast á vellinum gæti draumur þeirra verið búinn.” “Þetta er fótboltaleikvangur. Hann var byggður fyrir fótbolta,” sagði Ferdinand gramur en auk fótboltans er Wembley notaður undir rugby, tónleikahald og ýmislegt fleira, meira að segja mótórhjólasýningar. “Ef það eru svona margir hlutir í gangi á leikvangnum sem gera yfirborðið svona lélegt þarf bara að taka ákvörðun samkvæmt því. Reyndar eru margir leikvangar um allan heim notaðir undir ýmsa viðburði en þeir eru ekki svona lélegur, svo kannski þarf að skoða það,” sagði fyrirliðinn. Alls hefur ellefu sinnum verið skipt um gras á leikvangnum síðan hann var tekinn í notkun árið 2007. Leikvangurinn kostaði 750 milljónir punda.