Ronaldo fær skaðabætur

Breska dagblaðið Daily Telegraph hefur komist að samkomulagi við Cristiano Ronaldo um að greiða honum umtalsverðar skaðabætur vegna fréttar sem blaðið birti um hann.

Blaðið hélt því fram í júlí árið 2008 að Ronaldo, sem þá var að glíma við ökklameiðsli, hafi lagt frá sér hækjurnar á skemmtistað í Hollywood og farið út á dansgólfið með fjórum fyrirsætum. Hann hafi þar að auki pantað sér rándýrt kampavín.

„Þessir atburðir gerðust ekki," sagði lögræðingur Ronaldo við réttarhöldin. „Hann fór vissulega á umræddan skemmtistað en drakk ekki dropa af áfengi þar. Hann drekkur ekki þar sem hann tekur heilsu sína mjög alvarlega."

Blaðið viðurkenndi að fréttin hafi verið röng og baðst afsökunnar á birtingu hennar. Það hefur nú greitt Ronaldo umtalsverðar skaðabætur og séð um allan hans málskostnað þar að auki. Sjálf skaðabótarupphæðin er ekki gefin upp.