Fowler búinn að opna markareikninginn sinn hjá Perth

Robbie Fowler skoraði mark úr vítaspyrnu undir lok leiks Perth Glory og Melbourne Heart og bjargaði þar með stigi fyrir Perth. Lokatölur leiksins 2-2.

Það hefur hvorki gengið né rekið hjá Melbourne í deildinni og því áttu fáir von á því að liðið myndi velgja toppliði Perth undir uggum.

Það voru komnar tvær mínútur fram yfir venjulegan leiktíma þegar Perth fékk vítið. Fowler var yfirvegaður á punktinum og skoraði af öryggi. Þetta var hans fyrsta mark fyrir félagið.

Perth komst með stiginu á topp deildarinnar.