Didier Drogba: Sven-Goran Eriksson mun ná árangri með landsliðið okkar

Didier Drogba, framherji Chelsea og landsliðs Fílabeinsstrandarinnar, er ánægður með nýja landsliðsþjálfarann sinn en Sven-Goran Eriksson mun þjálfa Fílabeinsströndina á HM í Suður-Afríku í sumar.

„Það er engin vafi í mínum huga að Sven-Goran Eriksson muni ná árangri með landsliðið okkar," sagði Didier Drogba við vefsíðuna www.football365.co.za.

„Þarna er maður sem þekkir fótbolta út og inn. Hann á eftir að fara langt með liðið á HM og fer kannski enn lengra en markmiðin sem sett voru fyrir hann af knattspyrnusambandinu okkar," sagði Drogba.

„Það litla sem ég sá þegar hann var með enska landsliðið og af því sem ég hef heyrt um hann og hans vinnu þá tel ég að Sven hafi komið á hárréttum tíma fyrir okkur," sagði Drogba.

„Við erum að fara til Suður-Afríku til þess að ná árangri og það er ekki bara ég sem er að segja þetta. Það ætla allir í liðinu að ná alvöru árangri á HM í sumar," sagði Drogba að lokum.