Dunga gefur í skyn að Ronaldinho fari ekki á HM

Dunga, landsliðsþjálfari Brasilíu, virðist vera búinn að loka hurðinni á Ronaldinho miðað við orðin sem hann lét falla eftir landsleikinn gegn Írum í gær er hann var pressaður á svar um leikmanninn.

„Pelé var einu sinni besti leikmaður heims. Ég spilaði einnig á sínum tíma. Leikmenn koma og fara. Við erum búnir að ákveða liðið okkar en þurfum að ganga frá nokkrum hlutum," sagði Dunga en hann er afar ánægður með Robinho sem lagði upp bæði mörkin gegn Írum.

„Það leynir sér ekki að hann er aftur orðinn hamingjusamur. Hann vill fá boltann í fæturna og þarf að spila vel svo hann sé hamingjusamur. Hann sýndi í þessum leik hvað hann getur gert. Robinho er leikmaður sem hefur alltaf mikinn metnað fyrir landsliðinu."