Biðin loksins á enda - Enski boltinn byrjar í dag

Heimsmeistaramótið í Suður-Afríku linaði þjáningar margra sem geta ekki lifað án enska boltans. Þeir geta þó tekið gleði sína á ný því veislan um helgina hefst með stórleikjum.

Allir bíða spenntir eftir að sjá sitt lið en þeir hlutlausu bíða spenntastir eftir Manchester City. Yfir 100 milljónir í leikmannakaup og margir hæfileikaríkustu knattspyrnumenn heims koma þar saman í hádeginu og mæta Tottenham.

Margir bíða líka spenntir eftir að sjá eina Íslendinginn í deildinni, Grétar Rafn Steinsson sem spilar með Bolton. Orðrómur er þó uppi um að Eiður Smári Guðjohnsen gangi í raðir Fulham fljótlega.

Hér gefur að líta upplýsingar um liðin fyrir leikina í dag og fyrsta stórleik tímabilsins sem er á morgun þegar Liverpool tekur á móti Arsenal. Upplýsingarnar eru fengnar frá BBC.

Tottenham - Manchester City

Manchester City mun líklega skarta nýjum stórstjörnum á borð við Yaya Toure, David Silva, Jerome Boateng og Aleksandar Kolarov í byrjunarliðinu. Shay Given verður væntanlega í markinu. Gareth Bale verður í byrjunarliði Tottenham en bæði Roman Pavlyuchenko og Jonathan Woodgate eru frá vegna meiðsla.

Aston Villa - West Ham

James Milner verður væntanlega ekki með Villa en hann er á leiðinni til Manchester City. Hann var samt settur í leikmannahópinn fyrir leikinn. Villa verður án varnarmannanna James Collins og Carlos Cuellar en Curtis Davies hristir líklega af sér meiðsli líkt og Gabriel Agbonlahor. Kevin MacDonald, stjóri varaliðsins, stýrir Villa.

Nýju mennirnir hjá West Ham, Pablo Barrera, Winston Reid, Tal Ben Haim og Frederic Piquionne, byrja væntanlega allir en Thomas Hitzlsperger gæti misst af því að mæta sínu gamla félagi þar sem hann haltraði af velli í æfingaleik Þjóðverja í vikunni.

Blackburn - Everton

Nikola Kalinic og Chris Samba eru klárir hjá Blackburn en eru ekki í mikilli leikæfingu, ekki frekar en Mame Diouf sem er í láni frá Manchester United. Vince Grella er meiddur.

Marouane Fellaini byrjar líklega á bekk Everton en Tim Cahill verður í byrjunarliðinu þrátt fyrir að missa af landsleik Ástrala í vikunni vegna meiðsla.

Bolton - Fulham

Grétar Rafn byrjar líklega hjá Bolton sem verður án miðjumannanna Gavins McCann og Joey O'Brien. Johan Elmander og Kevin Davies gætu byrjað saman frammi.

Philippe Senderos verður frá í hálft ár hjá Fulham auk þess sem Damien Duff og Andy Johnson eru meiddir.

Sunderland - Birmingham

Darren Bent ætti að byrja frammi en markmaðurinn Craig Gordon er meiddur. Michael Turner og Jack Colback eru í banni.

Birmingham vonast til að Ben Foster geti byrjað í markinu en Stephen Carr missir líklega af leiknum líkt og Kevin Phillips sem verður frá í nokkrar vikur.

Wigan - Blackpool

Mauro Boselli byrjar í liði Wigan en hann á að vera stjarna liðsins í vetur. Gary Caldwell er í banni en hann er einnig meiddur og verður frá í sex vikur.

Marlon Hare­wood gæti byrjað hjá nýliðum Blackpool sem er spáð ömurlegu gengi í vetur. Keith Southern missir af leiknum líkt og Billy Clarke og Louis Almond.

Wolves - Stoke

Nýju mennirnir Jelle van Damme, Steven Fletcher og Steven Mouyokolo byrja líklega hjá Úlfunum. Stephen Hunt er enn tæpur líkt og Kevin Doyle.

Stjarna Stoke, Kenwyne Jones sem kom fyrir metfé frá Sunderland gæti byrjað en Abdoulaye Faye, Liam Lawrence og Glenn Whelan verða ekki með.

Chelsea - WBA

Englandsmeistararnir hefja titil­vörnina gegn liði sem margir spá falli. Bíða þarf fram á síðustu stundu til að sjá hvort Frank Lampard nái leiknum eftir að hann sneri sig á ökkla í vikunni. Petr Cech byrjar í markinu og Alex með John Terry í miðvarðarstöðunni. Didier Drogba er óðum að ná sér eftir aðgerð en gæti spilað. Nýi maðurinn Yossi Benayoun verður líklega á bekknum.

Graham Dorrans og Pablo Ibanez eru tæpir hjá WBA.

Liverpool - Arsenal

Fernando Torres gæti byrjað hjá Liverpool á morgun þrátt fyrir að hafa ekkert tekið þátt í undirbúningstímabilinu. Roy Hodgson hrósaði ákveðni hans í gær. Pepe Reina byrjar í markinu og Joe Cole líka. Christian Paulsen verður væntanlega á bekknum.

Arsenal verður án Johan Djourou, Nicklas Bendtner og Aaron Ramsey. Alex Song, Denilson og Abou Diaby eru allir tæpir vegna meiðsla. HM-mennirnir Cesc Fabregas og Robin van Persie byrja væntanlega á bekknum.

Manchester United spilar ekki fyrr en á mánudag þegar liðið mætir Newcastle.