Villa ekki refsað fyrir kinnhestinn

Spánverjar fengu góðar fréttir í dag þegar staðfest var að framherjanum David Villa verði ekki refsað fyrir að slá Emilip Izaguirre, leikmann Hondúras, létt utan undir.

"Aganefndin hefur farið yfir málið og sér enga ástæðu til þess að aðhafast frekar. Málið var reyndar aldrei opnað," segir í yfirlýsingu frá FIFA.

Villa skoraði tvö mörk í leiknum en missti stjórn á skapi sínu í smá stund þegar traðkað var á honum.

"Ég er ekki stoltur af þessu. Þetta voru eðlileg viðbrögð hjá mér. Ég átti ekki von á því að varnarmaðurinn myndi traðka á mér. Ég brást vitlaust við og mun reyna að halda ró minni í framtíðinni," sagði Villa.