Gerrard: Stórslys ef við komumst ekki áfram

Steven Gerrard segir að það væri ekkert annað en stórslys ef enska landsliðið fellur úr keppni á HM í dag. Gerrard segir að liðið sé alltof gott til þess að falla úr leik þetta snemma í keppninni.

"Við erum alltaf sigurstranglegri aðilinn en leikirnir hafa verið mjög erfiðir. Slóvenar þurfa jafntefli í dag en við verðum að vinna. Það er vissulega mikil pressa á okkur en við megum ekki láta pressuna koma okkur úr jafnvægi. Óttinn við að tapa keyrir okkur áfram og við erum komnir hingað til þess að vera með allt til enda," sagði Gerrard.

"Það er alltaf pressa að spila fyrir England. Því fylgir ótti og það hjálpar ekki að spila óttasleginn. Menn verða að slaka á, vera þolinmóðir og þá kemur þetta. Við erum hættir að gera það sem við gerum best. Er við horfðum aftur á Alsír-leikinn þá sáum við greinilega að við vorum ekki nógu ákveðnir. Það væri algjört stórslys ef þessi hópur fer heim eftir riðlakeppnina. Við viljum miklu meira en það."