Capello bannar leikmönnum að tala um John Terry

Fabio Capello, landsliðsþjálfari Englands, hefur miklar áhyggjur af því að skandallinn í kringum John Terry muni hafa mikil áhrif á leikmannahóp landsliðsins.

Hann er því sagður hafa haldið stuttan fund með landsliðinu í gærkvöldi þar sem hann meinaði leikmönnum að tjá sig frekar um málið. Hann sagði við leikmenn að nú væri kominn tími til þess að horfa fram á veginn og einbeita sér að því að vinna heimsmeistarakeppnina.

Capello hefur áhyggjur af því að málið muni eyðileggja móralinn í hópnum þar sem einhverjir leikmanna liðsins eigi að vera afar ósáttir við Terry.

Capello vill ekki að menn séu að hvísla út í horni og hefur beint þeim tilmælum til leikmanna að ræða við sig persónulega séu þeir ósáttir með eitthvað.