Tabarez hlær af Parreira

Oscar Tabarez, landsliðsþjálfari Úrúgvæ, gefur lítið fyrir gagnrýni Carlos Alberto Parreira, landsliðsþjálfara Suður-Afríku, en sá var afar ósáttur við dómgæsluna í leik liðanna.

"Ég gæti ekki verið meira ósammála Parreira og hlæ hreinlega að því að við höfum unnið leikinn með hjálp dómarans. Við yfirspiluðum þá nefnilega allan leikinn," sagði Tabarez.

"Ég mætti annars ekki á blaðamannafund til þess að ræða frammistöðu dómara eða ummæli annarra þjálfara. Mitt mat er samt að sigurinn var fyllilega verðskuldaður."