Wenger ætlar ekki að breyta um stefnu í leikmannakaupum

Arsene Wenger segist ekki ætla að breyta um stefnu varðandi leikmannakaup Arsenal þar sem hann er knattspyrnustjóri.

Arsenal hefur ekki unnið titil síðan 2005 og síðan að félagið flutti á Emirates-leikvanginn ári síðar hefur Wenger einbeitt sér frekar að því að hlúa að ungum leikmönnum en að kaupa dýra og þekkta leikmenn.

„Ég hef ekkert á móti því að eyða pening," sagði Wenger. „Við viljum láta reksturinn standa undir sér. Ef þú vilt setja félagið á hausinn er ég ekki rétti maðurinn til þess."

Wenger eyddi þó fimmtán milljónum punda í Rússann Andrey Arshavin og mörgum stuðningsmönnum Arsenal finnst það ekki nóg og vilja fleiri stórstjörnur til félagsins.

Wenger gaf þó í skyn að hann gæti hugsanlega styrkt vörn Arsenal-liðsins í sumar með leikmannakaupum. Hann segir að varnarleikurinn sé helsti munurinn á liðum Arsenal og Manchester United.

„Við erum jafngóðir á vallarhelmingi andstæðingsins og Manchester United. Við höfum hins vegar fengið fleiri mörk á okkur og þar liggur munurinn - við höfum fengið 36 mörk á okkur en þeir 24."

Hann segir að hann myndi einnig vilja hækka meðalaldurinn í liðinu.

„Við þurfum ekki fleiri reynslulitla leikmenn. Ef við fáum nýja leikmenn verða það leikmenn sem búa yfir reynslu."