Blackburn á höttunum eftir Ivan de la Pena

Knattspyrnustjórinn Sam Allardyce býr sig nú undir að láta til sín taka á leikmannamarkaðnum og breskir fjölmiðlar greindu frá því í dag að Ivan de la Pena hjá Espanyol væri á meðal þeirra leikmanna sem kæmu fyrir á óskalistanum.

Umboðsmaður miðjumannsins gamalreynda staðfesti í samtali við dagblaðið Daily star að Blackburn hefði áhuga á skjólstæðingi sínum. Samningur de la Pena rennur út í sumar en Espanyol er í miklum fjárhagskröggum eins og stendur og ekki er víst að félagið geti mætt launakröfum leikmannsins.

„Við erum að vinna í hans málum og það eru þegar komin nokkur samningstilboð inn á borð til okkar. Eitt af þeim er frá Blackburn en það eru líka samningsboð frá Rússlandi og Grikklandi. Ivan væri samt ekki mótfallinn því að vera áfram hjá Espanyol ef félagið myndi borga honum eins og hann á skilið," segir umboðsmaðurinn Mauel Ferrer.

Blackburn er einnig orðað við Egyptann Mohamed Zidan sem leikur með Borussia Dortmund og þá liggur fyrir að Brett Emerton og Morten Gamst Pedersen verði áfram í herbúðum enska félagsins en þeir hafa báðir verið orðaðir við félagsskipti undanfarið.