Klinsmann getur sofið rólegur

Stjórnarformaður Bayern Munchen segir að Jurgen Klinsmann þjálfari þurfi ekki að hafa áhyggjur af því að verða rekinn þó liðið falli úr leik gegn Barcelona í Meistaradeild Evrópu.

Klinsmann hefur verið gagnrýndu nokkuð að undanföru enda stendur ekki steinn yfir steini í leik Bayern í þýsku úrvalsdeildinni. Liðið steinlá 5-1 fyrir toppliði Wolfsburg á laugardaginn og hefur á engum tímapunkti náð toppsætinu í úrvalsdeildinni í vetur sem er harla óvenjulegt á þeim bænum.

Klinsmann hefur ef til vill bjargað andlitinu með góðum árangri í Meistaradeildinni, en þar hefur gengi liðsins verið ofar miklum væntingum Bayern-manna ef eitthvað er.

Karl-Heinz Rummenigge stjórnarformaður ætlar sér ekki að taka það út á Klinsmann ef Bayern fellur úr leik fyrir ógnarsterkum Spánarmeisturunum.

"Það er enginn að hugsa um það að Klinsmann missi starfið. Okkur dettur ekki í hug að lýsa því yfir að við ætlum að reka þjálfarann ef við fáum skell gegn Barcelona. Klinsmann er auðvitað með samning og við sjáum ekki fram á annað en að staðið verði við hann," sagði Rummenigge í samtali við þýska fjölmiðla.

Bayern verður án tveggja miðvarða í fyrri leiknum á Spáni. Daniel Van Buyten missir af leiknum af persónulegum ástæðum og Brasilíumaðurinn Lucio er meiddur. Það kemur því væntanlega í hlut Martin Demichelis og hins 19 ára gamla Breno að standa í hjarta varnarinnar.