Bjarni Viðarsson til Belgíu

Bjarni Þór Viðarsson gekk í gær til liðs við belgíska úrvalsdeildarfélagið KSV Roesalare frá FC Twente í Hollandi.

Bjarni fékk fá tækifæri hjá Twente en lengst af var hann meiddur. Hann kom til félagsins í janúar í fyrra eftir að hafa verið á mála hjá Everton frá því hann var sextán ára gamall. Hann er nú á 21. aldursári.

Bræður Bjarna, Arnar og Davíð, hafa báðir leikið í Belgíu. Arnar leikur nú með Cercle Brügge en lék áður lengi með Lokeren, sama félagi og Davíð lék með til skamms tíma. Davíð leikur nú sem kunnugt er með FH.

Félagaskipti Bjarna voru kunngjörð á heimasíðu Roeselare í gær.