Á Ísland rétt á sérstakri aðstoð vegna bágrar skuldastöðu?

Skuldir ríkissjóðs eru komnar yfir þau mörk sem réttlæta sérstaka aðstoð vegna bágrar skuldastöðu. Skuldir ríkisins eru bilinu tvöfaldar til þrefaldar skatttekjur þess.

Útreikningar Seðlabankans á afleiðingum Icesave samningsins hafa verið gagnrýndir, en Seðlabankinn telur þjóðarbúið fyllilega fært um að standa undir greiðslum vegna Icesave.

Á vefsíðu Alþjóðagjaldeyrissjóðsins má finna upplýsingar um alþjóðlega mælikvarða á skuldir landa og hvernig reikna beri skuldastöðuna.

Ýmsar aðferðir eru notaðar þegar skuldaþol landa er metið.

Ein aðferð gengur út á að skoða hlutfallið milli erlendra skulda ríkisins og skatttekna ríkissjóðs. Samkvæmt mati Seðlabankans eru erlendar skuldir ríkisins með Icesave 1.159 milljarðar á þessu ári.

Í fjárlagafrumvarpi er áætlað að tekjur ríkissjóðs árið 2009 verði 450 milljarðar. Hlutfall skulda ríkisins af skatttekjum er því 258%.

Þetta hlutfall er notað til að meta hvort skuldir landa séu orðnar það háar að of kostnaðarsamt sé að standa undir þeim. Mörkin liggja við 250%.

Ef skuldahlutfallið fer upp í það eru lönd komin í hóp þeirra ríkja sem eiga rétt á sérstakri aðstoð vegna bágrar skuldastöðu.