Davies framlengir samning sinn við Bolton

Framherjinn og fyrirliðinn Kevin Davies hjá Bolton hefur framlengt samning sinn við félagið til ársins 2012 og bundið þar með enda á sögusagnir þess efnis að hann kynni að yfirgefa Reebok-leikvanginn í sumar.

Knattspyrnustjórinn „Stóri" Sam Allardyce hjá Blackburn og fyrrum stjóri Bolton er mikill aðdáandi Davies og ku hafa reynt að fá hann í sumar.

Núverandi knattspyrnustjóri Bolton, Gary Megson, er afar ánægður með að halda framherjanum áfram hjá félaginu.

„Kevin er búinn að gefa hundrað prósent síðan ég kom til félagsins og það er frábært að hann sé búinn að skrifa undir nýjan samning. Hann er mikill leiðtogi innan vallar sem utan og setur öðrum leikmönnum félagsins frábært fordæmi," segir Megson í viðtali á opinberri heimasíðu Bolton.