Santa Cruz fáanlegur á 20 milljónir punda

Framherjinn Roque Santa Cruz á ekki von á öðru en að vera áfram í herbúðum Blackburn þrátt fyrir yfirlýstan vilja sinn að yfirgefa félagið.

Þannig er mál með vexti að leikmaðurinn er samningsbundinn Blackburn en klausa í samningi hans gerir það að verkum að áhugasöm félög geta keypt upp samning hans á 20 milljónir punda. Santa Cruz á ekki von á því á þessum síðustu og verstu tímum að einhver félög séu tilbúin að borga svo háa upphæð fyrir sig.

„Ef Blackburn vill ekki selja mig þá verð ég áfram á Ewood Park því ég skrifaði undir samning og mun því standa við hann. Samningurinn rennur út árið 2012 en til þess að hægt sé að kaupa hann upp verða félög að borga Blackburn 20 milljónir punda," segir Santa Cruz í samtali við Radio 970 AM í Paragvæ.

Talið er að forráðamenn Manchester City munir reyna aftur að fá Santa Cruz í sumar en þeir urðu að lúta í lægra haldi gegn þrjóskum forráðamönnum Blackburn í janúar félagsskiptaglugganum.

Samkvæmt heimildum Sky Sports fréttastofunnar er Blackburn ólíklegt til þess að sætta sig við kauptilboð minna en áðurnefndar 20 milljónir punda.

Hinn 27 ára gamli Santa Cruz kom til Blackburn frá Bayern München á 3,5 milljónir punda árið 2007.