Sir Bobby Robson fyrirgaf ekki Dennis Wise

The Sun birtir í dag á vefsíðu sinni grein frá Bob Harris rithöfundi. Harris lýsir þar samtali sínu við Sir Bobby Robson, nokkrum vikum áður en hann lést en þeir Harris og Robson voru góðir vinir.

Tilkynnt var á föstudag að Robson væri látinn eftir harða baráttu við krabbamein. Hann og Harris ræddu meðal annars mikið um stöðu Newcastle United en liðið féll úr úrvalsdeildinni á síðustu leiktíð og leit þess að nýjum eigendum stendur enn yfir.

Robson segist ekki kenna núverandi eiganda, Mike Ashley, um hrakfarir félagsins. „Hans hjarta sló með félaginu og hann þráði velgengni þess jafnmikið og ég. Stærstu mistökin voru frá þeim sem hópuðust kringum hann og störfuðu með honum," sagði Robson.

„Dennis Wise olli mér mestum vonbrigðum. Hann var ráðinn yfirmaður íþróttamála en sást varla á æfingasvæðinu. Hann sat inni á skrifstofu og verslaði leikmenn sem hentuðu ekki Newcastle United. Ég fyrirgef flestum en ég er ekki viss um að geta fyrirgefið Wise fyrir það sem hann gerði félaginu mínu."