Bo: Michael er hinn svarti Elvis

„Ég hafði mjög gaman af tónlistinni hans og dáðist af fagmennskunni á plötunum. Bæði lagasmíði og upptökutækninni. Þær plötur sem standa upp úr eru auðvitað trílógina mikla: Off the Wall, Thriller og Bad."

„Þetta eru plötur sem standa upp úr í sögunni," segir Björgvin Halldórsson þegar Vísir biður hann um að minnast Michael Jackson sem lést í gær aðeins 50 ára gamall.

„Hann var snillingur sem naut aðstoðar margra aðra snillinga til að fullkomna sína list. Hann er hinn svarti Elvis. Hann var einn frægasti skemmtikraftur jarðarinnar og verður ódauðlegur nú eftir dauða sinn."

„Hann var listamaður sem læstist inní ímynd sinni og barðist við drauga frægðarinnar. Hann mun lifa í list sinni sem hann skilur eftir. Ekki skiptir máli hvað þú tekur með þér , heldur það sem þú skilur eftir þegar þú ferð. Ótrúlegur listamaður sem hafði hin mestu áhrif á dægurtónlist síðari áratuga," segir Björgvin að lokum.