Fabio Capello: Takk fyrir hjálpina Herra Bilic

Fabio Capello segir Slaven Bilic, þjálfara króatíska landsliðsins, hafa hjálpað sér mikið við undirbúning enska landsliðsins fyrir leikinn. Bilic sagði að enska liðið hafi tapað "enska stílnum" síðan að Capello varð þjálfari liðsins.

„Það eina sem ég get sagt er: Takk fyrir hjálpina Herra Bilic," sagði Capello og vísaði þá til þess að hann hefði með þessu fengið góða hjálp við að gera sína menn klára í leikinn.

Fabio Capello, þjálfari enska landsliðsins, segir leikinn á móti Króötum ekki snúast um það að bæta fyrir tapið fyrir tveimur árum þegar Króatar unnu á Wembley og sáu til þess að Englendingar komust ekki á Evrópumótið í Sviss og Austurríki.

„Sá leikur er gamall og orðinn hluti af sögunni. Ég horfi miklu frekar á næsta leik og ætla ekki að fara að tala um leik sem var spilaður fyrir tveimur árum. Ég þarf að gera mína menn tilbúna fyrir leikinn á morgun en ekki fyrir það sem gerðist árið 2007. Þeir koma inn í þennan leik og ætla að bæta fyrir það sem gerðist í Króatíu í fyrri leiknum," sagði Capello.

„Við eigum þrjá úrslitaleiki eftir í riðlinum. Á morgun verður sá fyrsti, svo förum við til Úkraínu og mætum svo Hvít-Rússum á heimavelli. Við verðum að vinna einn þessara leikja eða ná jafntefli í nokkrum. Það sem skiptir mestu máli er að vinna riðillinn og komast beint á HM. Við höfum spilað vel á Wembley, höfum unnið alla leikina þar og það hefur okkur mikið sjálfstraust. Það breytist vonandi ekki á morgun," sagði Capello.

Capello sagðist einnig vera nokkurn veginn búinn að ákveða það hvort Emile Heskey eða Jermain Defoe verði í byrjunarliðinu en hann sagði báða leikmenn vera mikilvæga fyrir liðið á sinn hátt. Flestir búast við að Defoe fá tækifærið en hann hefur skorað fimm mörk í þremur síðustu leikjum sem hann hefur komið inn á sem varamaður.