Umfjöllun: Ísland vann 3-1 sigur á Georgíu

Ísland vann í kvöld 3-1 sigur á Georgíu í vináttulandsleik sem fram fór á Laugardalsvellinum.

Garðar Jóhannsson, Ólafur Ingi Skúlason og Veigar Páll Gunnarsson skoruðu mörk Íslands í leiknum en þeir tveir fyrstnefndu opnuðu þar með markareikniginn sinn með landsliðinu. Mark Veigars kom úr víti.

Íslenska liðið byrjaði ljómandi vel í leiknum og uppskar nokkur fín færi og tvö góð mörk.

Það fyrra skoraði Garðar Jóhannsson með skalla eftir fyrirgjöf Grétars Rafns en markið var nánast afrit af því sem Eiður Smári Guðjohnsen skoraði gegn Noregi um helgina.

Aðeins þremur mínútum síðar var komið að Ólafi Inga Skúlasyni sem skoraði með góðu skoti úr vítateignum eftir einkar laglegan undirbúning Veigars Páls. Hann lagði boltann hárfínt fyrir fætur Ólafs.

Þetta voru fyrstu mörk þeirra félaga með íslenska landsliðinu og fögnuðu þeir þeim vel og innilega. Ólafur Ingi fékk svo gott færi stuttu síðar til að bæta við öðru marki sínu en hann skallaði yfir þegar hann stóð einn fyrir opnu marki.

En eftir um 25 mínútna leik virtist leikur íslenska liðsins hrynja. Það léttleikandi og einfalda spil sem hafði einkennt leikinn var fyrir bí og gestirnir frá Georgíu komu sér betur inn í leikinn.

Þeir minnkuðu svo muninn á 33. mínútu. Það kom fyrirgjöf frá vinstri kantinum sem Kristján Örn Sigurðsson hefði átt að hreinsa frá marki en hann hitti boltann illa. Það var svo Vladimir Dvalishvili sem náði til knattarins og skoraði með fínu skoti úr teignum.

Skömmu eftir þetta sköpuðu svo Georgíumenn tvívegis hættu við íslenska markið en sem betur fer tókst þeim ekki að jafna.

Ísland varð svo fyrir öðru áfalli á 36. mínútu þegar að Grétar Rafn Steinsson þurfti að fara meiddur af velli. Hann hafði verið mjög sprækur í leiknum og verið virkur í sóknarleik íslenska liðsins.

Þó gerðist ekki meira markvert í fyrri hálfleik og var allt annað að sjá til íslenska liðsins í upphafi þess síðari. Liðið fór að spila betur á nýjan leik og áttu nokkrar fínar marktilraunir.

Á 54. mínútu dró svo til tíðinda þegar að varnarmaður Georgíu handlék knöttinn eftir skot Stefáns Gíslasonar. Veigar Páll skoraði af öryggi úr vítinu.

Eftir þetta hafði Ísland góða stjórn á leiknum og lítið gekk hjá gestunum. Íslensku leikmennirnir hefðu jafnvel getað skorað fleiri mörk en varamaðurinn Pálmi Rafn átti ágæt skot að marki sem markvörður Georgíu varði.

Sami markvörður varði svo ótrúlega frá Ólafi Inga aðeins mínútu síðar. Ólafur og Garðar sundurléku vörn gestanna og Ólafur þurfti bara að þruma knettinum í netið en markvörðurinn náði að bjarga skoti hans í horn.

Það var svo í uppbótartíma að Pálmi Rafn átti annað skot að marki sem var varið en í þetta sinn náði Kristján Örn að fylgja því eftir. Hann skaut hins vegar í stöngina. Þetta reyndist síðasta færið í leiknum og Ísland fagnaði góðum 3-1 sigri á annars arfaslöku liði Georgíu.

Ísland - Georgía 3-1

1-0 Garðar Jóhannsson (13.)

2-0 Ólafur Ingi Skúlason (17.)

2-1 Vladimir Dvalishvili (33.)

3-1 Veigar Páll Gunnarsson, víti (55.)

Laugardalsvöllur. Áhorfendur: 4726

Dómari: Matteo Treffoloni (7)

Skot (á mark): 13-5 (9-2)

Varin skot: Gunnleifur 1 - Mamaladze 5.

Horn: 6-2

Aukaspyrnur fengnar: 8-17

Rangstöður: 1-4

Leiknum var lýst beint á Boltavakt Vísis og Fréttablaðsins og má lesa lýsinguna hér: Ísland - Georgía.