Portsmouth beinir athyglinni að Viduka

Stjórnarformaðurinn Peter Storrie hjá Portsmouth viðurkennir að félagið hafi hug á því að fá Ástralann Mark Viduka sem er með lausan samning hjá Newcastle en segir aftur á móti ólíklegt að Amr Zaki komi til félagsins á láni.

Portsmouth hefur verið að leita að framherja eftir söluna á Peter Crouch til Tottenham og Viduka virðist líklegur kostur í stöðunni ef marka má nýlegt viðtal við stjórnarformanninn við staðarblaðið The News í Portsmouth.

„Ef Mark Viduka getur sýnt fram á það að hann sé í góðu líkamlega ásigkomulagi þá kemur hann vissulega sterklega til greina. Þetta er líka mikilvægt ár fyrir hann þar sem hann á möguleika á því að fara með liði sínu á HM í Suður-Afríku á næsta ári ef hann stendur sig vel á Englandi. Við værum heimskir ef við vildum ekki fá Mark hingað.

Varðandi sögusagnirnar um Zaki þá er þetta fyrst og fremst komið frá umboðsmanni leikmannsins. Ef eitthvað skyldi gerast í þeim málum þá þyrftum við að fá einhvers konar tryggingu á því að hann hagi sér eins og maður og verði ekki uppvís um agavandamál eins og gerðist á síðustu leiktíð þegar hann var hjá Wigan," segir Storrie.