Michael Hudson: Geta Íslendingar borgað?

Ísland er til umfjöllunar í grein í Financial Times í dag eftir hagfræðiprófessorinn Michael Hudson sem hefur starfað sem efnahagsráðgjafi ríkisstjórna Bandaríkjanna, Kanada, Mexíkó og Lettlands. Hann skrifar um skuldastöðu Íslands og Lettlands og spyr hvort ríkin geti greitt erlendar skuldir.

Alþjóða gjaldeyrissjóðurinn og Evrópusambandið ætlist til að skuldir ríkjanna verði greiddar með því að hækka skatta á almenning, draga úr opinberum útgjöldum og fá fólk til að eyða sparifé sínu.

Takmörk séu hins vegar fyrir því hve háar erlendar skuldir þjóðir geti greitt. Þó skattar séu hækkaðir sem erfitt að breyta þeim tekjum í erlenda mynt. Hudson segir að Íslendingar og Lettar verði sífellt reiðari þeim sem söfnuðu skuldunum og erlendum lánardrottnum.

Stuðningur Íslendinga við aðild að Evrópusambandinu minnki og flokkur rússneskumælandi Letta fái meira fylgi.

Hudson spyr hvernig Bretar og Hollendingar bregðist við fyrirvörum við Icesave samninginn og segir að skuld sem ekki sé hægt að greiða fáist ekki greidd. Þá þurfi að spyrja hvort afskrifa skuli eða steypa skuldsettum ríkjum í örbirgð til að ná sem mestu fram.