Eitt af stóru fjórum að kaupa Glen Johnson

Peter Storrie stjórnarformaður Portsmouth hefur staðfest að bakvörðurinn Glen Johnson sé líklega á förum frá félaginu eftir að mjög hagstætt tilboð barst í leikmanninn.

Storrie vildi ekki tilgreina um hvaða félag væri að ræða en gaf í skyn að það væri eitt af „stóru fjórum" félögunum á Englandi, þ.e.a.s. Manchester United, Liverpool, Chelsea eða Arsenal.

„Glen átti frábært tímabil með Portsmouth á síðustu leiktíð en ef að félag sem getur boðið upp á Meistaradeildarfótbolta kemur kallandi þá geturðu ekki staðið í vegi fyrir leikmanninum. Ég sagði honum sjálfum að ég gæti ekki staðið í vegi hans. Ef kauptilboðið er gott og leikmaðurinn fær góðan samning þá hugsa ég að það sé ekki langt í land með þetta," segir Storrie viðurkenndi að kauptilboðið væri líklega á bilinu 15-18 milljónir punda.

Það er þó mjög líklega hægt að afskrifa Chelsea strax þar sem leikmaðurinn var ekki ánægður í herbúðum félagsins á sínum tíma og kvað félagið hafa eyðilagt ást sína á fótbolta. United, Liverpool og Arsenal koma hins vegar öll sterklega til greina.