Meistaradeildarsæti eða Barry fer?

Martin O´Neill, stjóri Aston Villa, viðurkennir fúslega að Gareth Barry gæti yfirgefið félagið í sumar. Barry á ekki nema tólf mánuði eftir af samningi sínum.

Hann var næstum farinn til Liverpool í fyrra og er ekki útilokað að Liverpool reyni aftur að kaupa hann.

„Mun Liverpool reyna aftur við Barry? Ég veit það ekki. Þetta umræðuefni kemur alltaf reglulega upp og ég veit ekki hversu oft ég hef þurft að segja nákvæmlega sömu hlutina. Ég veit ekki hvað Liverpool er að hugsa og mér er í raun nokkuð sama um það," sagði O´Neill en Villa spilar einmitt gegn Liverpool á morgun.

„Í sumar mun ég endurtaka það sama og áður. Ef við komumst í Meistaradeildina eru líkur á því að Barry skrifi undir nýjan samning við okkur," sagði O´Neill.