Konur sitja fastar í ofbeldissambúðum

Þess eru dæmi að konur sitji fastar í ofbeldis­sambúðum, þar sem þær deila óseljan­legum eignum með makanum, bæði eru með mikla skuldabyrði og þær sjá ekki fram á að geta sett á stofn og rekið nýtt heimili.

Þetta segir Sigþrúður Guðmundsdóttir, framkvæmdastýra Kvennaathvarfsins. Hún segir þetta vera eina birtingarmynd á áhrifum kreppunnar á heimilis­ofbeldi. Aðsókn að dvöl í Kvenna­athvarfinu var mjög mikil fyrst eftir að kreppan skall á en hefur verið minni það sem af er þessu ári heldur en í fyrra, að sögn Sigþrúðar.

„Hins vegar koma fleiri konur í viðtöl. Við heyrum í mörgum konum sem eru að leita sér leiðar út úr ofbeldissambandi og íhuga að koma í Kvennaathvarfið. Vissulega höfum við alltaf öðru hvoru fengið konur sem talin hefur verið trú um að þær gætu ekki staðið á eigin fótum fjárhagslega séð. En það er vissulega oft erfiðara í ákveðnum tilvikum að hrekja þær ranghugmyndir nú en oft áður."

Sigþrúður segir að sumar þeirra kvenna sem hafi komið í viðtöl í Kvennaathvarfinu hafi tjáð sig um að ofbeldi í samböndum þeirra hafi aukist eftir að makinn missti vinnuna eða fjárhagserfiðleikar á heimilinu tóku að aukast.

Sigþrúður segir enn fremur áberandi að erlendum konum sem leita til Kvennaathvarfsins hafi fækkað mjög mikið. Í fyrra hafi þær verið um helmingur dvalarkvenna. Fyrstu mánuðina eftir hrun hafi þær ekki sést en það sé nú að breytast aftur til fyrra horfs.

„Eina skýringin á þessu sem okkur dettur í hug er sú að þær bíti frekar á jaxlinn núna og fari síður að heiman til dæmis af ótta við atvinnuleysi, þar sem dvalarleyfi getur verið tengt atvinnuleyfi eða ótta við að geta ekki framfleytt sér. Það er því miður engin ástæða til að ætla að ofbeldi gagnvart konum hafi minnkað. Við óttumst að heimilisofbeldi aukist í tengslum við bágt efnahagsástand. Þrátt fyrir allt er enn sem fyrr mikilvægt að hafa í huga að kynbundið ofbeldi á sér stað í öllum stéttum og er síður en svo bundið við efnaminni heimili, atvinnulausa eða félagslega einangrað fólk. Þeir þættir eru engu að síður áhættuþættir sem geta leitt til ofbeldis í samböndum þar sem aðrir áhættuþættir eru til staðar svo sem skortur á jafnrétti, virðingu og hæfni til að leysa úr ágreiningi á friðsamlegan hátt." jss@frettabladid.is