Brynjar Björn og Reading að ná saman um nýjan samning?

Greint er frá því á heimasíðu The Wokingham Times í dag að landsliðsmaðurinn Brynjar Björn Gunnarsson sé nálægt því að skrifa undir nýjan samning við Reading.

Núgildandi samningur Brynjars Björns við Reading er á enda runninn en enska b-deildarfélagið er sagt vera tilbúið að bjóða honum árs langan samning.

„Brynjari hefur verið boðinn nýr samningur og ég býst við því að hitta hann og umboðsmann hans á næstu dögum. Brynjar Björn vill ef til vill sjá fyrst hvað annað sé í boði og þá hugsanlega lengri samningstilboð og við sýnum því fullan skilning. Við vonumst auðvitað til þess að hann verði áfram en ef hann fer þá óskum við honum alls hins besta," segir Nick Hammond yfirmaður knattspyrnumála hjá Reading.

Hinn 33 ára gamli Brynjar Björn hefur verið í herbúðum Reading síðan árið 2005 en áður lék hann með Watford, Stoke og Nottingham Forest á Englandi.