Fleiri erlendir í varðhaldi en íslenskir

Mun fleiri útlendingar en Íslendingar sátu í gæsluvarðhaldi hér á landi á síðasta ári. Hlutfallið er nær helmingur, það sem af er þessu ári. Kostnaður vegna erlendra ríkisborgara í íslenskum fangelsum nemur tæpum 200 milljónum króna á ári.

Þjófnaðarmál, sem erlendir ríkisborgarar hafa verið viðriðnir, hafa verið áberandi fréttamál að undanförnu. Þessi mál hafa átt þátt í að auka mjög álagið á stofnanir og starfsmenn fangelsis-og lögreglumála, sem glíma við niðurskurð vegna efnahagsþrenginganna.

Ef rýnt er í tölfræði má sjá að í fyrra voru fleiri útlendingar úrskurðaðir í gæsluvarðhald en Íslendingar - 87 á móti 71 Íslendingi. Það sem af er þessu ári er hlutfall útlendinga þegar komið yfir 40 prósent.

Væntanlega munu flestir einstaklingarnir, sem eru á bak við þessar tölur, verða dæmdir fyrir brot sín og þurfa að sitja inni í íslensku fangelsi. En þar sem 240 afbrotamenn eru nú þegar á biðlista eftir fangelsisplássi þurfa útlendingarnir - eins og aðrir - að bíða þar til röðin kemur að þeim að hefja afplánun.

Mál þeirra útlendu fanga sem þegar sitja inni eru margvísleg, en séu þau sundurgreind er athyglisvert að tuttugu og einn afplánar vegna falsaðra vegabréfa og brota á útlendingalögum. Er aukning í þeim málaflokki áberandi eins og sést á þessum tölum.

Brottvísun útlendra fanga er seinvirk og nær ómöguleg í mörgum tilfellum, auk þess sem margir neita að afplána í heimalandi sínu. Vandinn er vaxandi fyrir íslensk réttaryfirvöld, en þótt fjöldi útlendra fanga sveiflist frá degi til dags, sýna meðaltalstölur að tuttugu útlendir ríkisborgarar hafa setið í íslenskum fangelsum dag hvern það sem af er þessu ári. Kostnaður vegna hvers fanga er talinn vera um 24 þúsund krónur á dag, sem gerir tæpa hálfa milljón daglega eða um 175 milljónir á ári.