Tottenham vann Lundúnaslaginn og komið á toppinn

Sigurganga Tottenham hélt áfram á Upton Park-leikvanginum í dag þegar liðið vann 1-2 sigur gegn West Ham í ensku úrvalsdeildinni en staðan var markalaus í hálfleik.

Carlton Cole kom heimamönnum í West Ham yfir með glæsilegu marki á 49. mínútu. Ljóminn var þó fljótur að fara af Cole þegar hann gerði slæm mistök fimm mínútum síðar.

Jermain Defoe, fyrrum leikmaður West Ham, komst inn í slaka sendingu hjá Cole og skoraði af öryggi framhjá Robert Green í marki West Ham.

Önnur slæm varnarmistök hjá Jonathan Spector urðu til þess að Aaron Lennon kom Tottenham yfir með góðu skoti á 79. mínútu og það reyndist vera sigurmark leiksins.

Tottenham er komið á topp deildarinnar með þrjá sigra í þremur leikjum og það er besta byrjun Tottenham síðan úrvalsdeildin komst á laggirnar.