Mun ekki geta rökstutt handtökuna á meðan jörðin snýst

Sveinn Andri Sveinsson, lögmaður konu sem handtekin var í tengslum við mansalsmálið svonefnda, segir lögreglustjórann á Suðurnesjum ekki á meðan jörðin snýst geta gefið neina raunhæfa skýringu á því af hverju konan var handtekin.

Konan er eiginkona Íslendings sem situr í gæsluvarðhaldi vegna mansalsmálsins. Hún var einnig handtekin og haldið yfir nótt. Sveinn Andri fór fram á að lögreglustjórinn bæðist opinberlega afsökunar á handtökunni. Konan væri í miklu áfalli og ekki yrði við það unað hvaða meðferð hún fékk. Að hans sögn ruddust 30 lögreglumenn í skotheldum vestum inn á heimili hjónanna og að tvö börn þeirra hafi fylgst með.

Sigríður Björk Guðjónsdóttir, lögreglustjóri á Suðurnesjum, sendi frá sér yfirlýsingu í dag þar sem hún hafnaði alfarið gagnrýni Sveins Andra um að harkalega hafi verið staðið að handtöku konunnar. Eru lýsingar lögmannsins á handtökunni sagðar fjarri sannleikanum, vel hafi verið farið að konunni og börnum hennar og valdbeiting ekki notuð. Í aðgerðum sínum hafi lögreglan haft að leiðarljósi að ganga ekki harðar fram en þörf væri á. Eiginmaður konunnar hafi hins vegar sýnt æsing og dónaskap, en hún sjálf verið ósamvinnuþýð og neitað að gefa þær upplýsingar sem óskað var eftir.

Sveinn Andri gefur ekki mikið fyrir yfirlýsingu Sigríðar. „Vegna þess að það er jafn erfitt fyrir mig að útskýra hvernig heimurinn varð til og fyrir lögreglustjórann að útskýra af hvaða ástæðum konan var handtekin. Sigríður getur ekki gefið neina raunhæfa skýringu á því og mun aldrei geta gefið. Konan var alls ekki ósamvinnufús eða neitt slíkt. Það var ekki nein ástæða fyrir handtökunni hvað þá að að halda henni yfir nótt. Þetta mun Sigríður aldrei á meðan jörðin snýst geta útskýrt."

Sveinn Andri segir að málinu sé hvergi nærri lokið. Hann hyggst skila inn greinargerð til lögreglustjórans á morgun. „Ef það verður ekki fallist á þetta verð ég að höfða mál og krefjast skaðabóta fyrir hönd konunnar vegna ólögmætrar handtöku," segir Sveinn Andri að lokum.