West Ham að krækja í Chamakh - Collins á leið til Stoke?

Samkvæmt heimildum The Telegraph er stjórnarformaðurinn Scott Duxbury hjá West Ham nú staddur í Frakklandi þar sem hann á í viðræðum við Bordeaux út af fyrirhuguðum kaupum á framherjanum Marouane Chamakh.

Franska félagið þverneitaði kauptilboði Lundúnafélagsins upp á 4,3 milljónir punda á dögunum en West Ham er sagt vera búið að leggja fram nýtt kauptilboð upp á 7 milljónir punda. Ekki er þó vitað hvort að Marokkómaðurinn hafi áhuga á að fara til West Ham en Arsenal var einnig sagt vera á höttunum eftir honum.

Knattspyrnustjórinn Gianfranco Zola hjá West Ham er hins vegar ekki búinn að fara leynt með vilja sinn að fá inn nýjan framherja til félagsins og ef allt gengur að óskum með Chamakh er félagið sagt ætla að fjármagna kaupin á honum með því að selja varnarmanninn James Collins til Stoke á 5 milljónir punda.