Bassong leitar sér að nýju félagi

Sebastien Bassong, varnarmaður hjá Newcastle, er nú að leita sér að nýju félagi eftir að Newcastle féll úr ensku úrvalsdeildinni í vor.

Bassong hefur verið sterklega orðaður við Arsenal og eru Manchester City, Aston Villa og Tottenham einnig sögð áhugasöm.

„Ég hef hafið viðræður við tvö ensk félög," sagði hann í samtali við franska fjölmiðla en hann vildi ekki gefa upp um hvaða félög þarna er að ræða.

Bassong kom til Newcastle frá Metz í júlí á síðasta ári. Hann er 22 ára gamall og landsliðsmaður Kamerún en hann er fæddur og uppalinn í Frakklandi.